На 14 и 15 октомври 2026 година, Националната установа Библиотека „Кочо Рацин“ – Тетово ја организираше Првата меѓународна библиотекарска конференција на тема „Мост на знаењето: Разновидност, дијалог и иновации во современите библиотеки“.
Конференцијата обедини библиотекарски професионалци, истражувачи и претставници на институции од различни земји, создавајќи значаен простор за размена на искуства, идеи и добри практики. Преку стручните излагања, дискусиите и заклучоците беше истакната улогата на библиотеките во развојот на знаењето, поттикнувањето на читачката култура, социјалната инклузија и приспособувањето кон дигиталната трансформација.
Успешното завршување на оваа конференција претставува значаен чекор кон зајакнување на професионалната и меѓународната соработка, како и кон афирмација на библиотеката како институција на знаењето, културата, дијалогот и континуираниот развој.
По завршувањето на сесиите од вториот ден и дискусијата за заклучоците, за учесниците беше организирана посета на Лешочкиот манастир во село Лешок и Шарената џамија во Тетово. Посетата им овозможи на гостите одблиску да се запознаат со богатото културно, историско и архитектонско наследство на нашата земја.
Библиотеката „Кочо Рацин“ – Тетово изразува искрена благодарност до сите учесници, автори на стручните трудови, истражувачи и колеги за нивниот придонес, ангажман и соработка. Посебна благодарност упатуваме до директорот на институцијата, Бинас Пајазити, како и до членовите на редакцискиот одбор, м-р Милка Котевска и м-р Елмедина Абдулахи, за нивниот ангажман во реализацијата на овој значаен стручен и културен настан.
Конференцијата беше реализирана со финансиска поддршка од Министерството за култура и туризам, на кое му изразуваме благодарност за поддршката на оваа иницијатива.
Со оваа конференција, Библиотеката во Тетово уште еднаш ја потврдува својата посветеност на развојот на современото библиотекарство, зајакнувањето на соработката и градењето мостови на знаење меѓу луѓето, институциите и културите.
MK 
SQ 
EN